ADDIO PULECENELLA!
Mme canuscite? Só' Pulecenella... só' n'ombra janca e torno 'mmiez'â folla: Mme voglio arricurdà d''e tiempe belle, 'e quanno se faceva 'o tira-e-molla p'avé nu vaso 'a quacche Palummella!... Pulecenè' ma tu, saje ca Napule s'è cagnata e 'sta rrobba nun se fa cchiù?! Mo sische e, llà pe' llà, tiene 'mbraccio tre piccerelle bell'e pronte a se fà vasà! II Mme voglio arricurdà stu bellu mare, addó', cu Palummella, jévo a fà 'ammore... pe' dint'a ll'onne, 'e lluce d''e llampare, parevano matasse 'e stelle d'oro, piscate, 'a cielo, 'a mille marenare... Pulecenè' ma tu, saje ca Napule s'è cagnata e 'sta rrobba nun se fa cchiù?! Mo invece, a mare, va sulo quacche contrabbandiere cu 'o prublema ch'ha da campà... III Vuje che dicite? Comme mme dispiace! 'A gente d'ogge nun è cchiù felice... Napule bella, t'hanno miso 'ncroce!... Mo che ce faccio ccà? Salute amice... Io mme ne torno addó' stó' 'nsanta pace... Oje luna, luna, lù', te saluta Pulecenella: 'ncopp''a Terra nun torna cchiù... Oje luna, luna, lù', ll'ombra janca 'e Pulecenella, cu te saglie p''o cielo blu...
Agostino Palomba - Luigi Bifulco