CHITARRATA D' AMMORE
Nannina tene 'o core 'nfus'ô ffèle, nun fa na cosa si nun mme fa male. Pure cu chesto 'a voglio bene assaje ca nun mm''a putarraggio maje scurdá. Ah - ah... Ah - ah... 'A cunuscette dinto primmavera, quanno 'o sole è lucente comm'a ll'oro e, comm'a ll'oro, dint'a ll'uocchie tene na luce ca te struje e te pò cecá! Ah - ah... Ah - ah... Si mm'ha da dá nu vaso sulamente, mm''o dá cu nu mussillo amaro e astrinto ca mme turmenta e nun mme sazia maje e 'e desiderio mme fa spantecá! Ah - ah... Ah - ah... Tene 'e capille nire e anèlle anèlle... na faccia delicata 'e madunnella, ll'uocchie curvine e na vocca 'e curallo ca n'ata eguale nun se pò truvá. Ah - ah... Ah - ah... Capisco quanno dice na buscía e quanno, pe' dispietto, è 'nfama assaje... ma è tanta 'a frenesia 'e vulerle bene ca si mm'accide, bene mme farrá! Ah - ah... Ah - ah... Comme te dá na gioja, te dá na pena... e sape vulé male e vulé bene. Ma si doce te guarda e t'accarezza, te dá 'o calore d''a felicitá. Ah - ah... Ah - ah... Si sulo mm'ha da dí ca mme vò' bene, primma mm''o ddice e doppo mm'avvelena cu nu dispietto o pure nu capriccio ca 'o core mme fa chiagnere e pená. Ah - ah... Ah - ah... E' tanto capricciosa ca nu sciore, ê vvote 'a fa felice...e pe' nu mare 'e bene e de ricchezze è indifferente e 'o core te fa strujere e 'mpazzí. Ah - ah... Ah - ah... Ma quanno 'a tengo stretta 'int'a sti bbracce e ca mme vasa e mm'accarezza 'a faccia... nun ce stanno puntiglie e né capricce che 'a dint''o core mm''a pònno levá! Ah - ah... Ah - ah...
Peppino De Filippo