Songo 'e nnove, dint''a branda,
cammenanno 'mmiez'ô mare,
mo, nemmanco 'o marenaro,
n'ora 'e pace pò truvá!
Truvá pace? E' na parola...
'o penziero va luntano...
mentre 'a tromba, chianu chiano,
'o silenzio va a suná...
Dice 'o signale:
Si tu mo te lagne
che nce guadagne?
Vide 'e durmí!
Duorme, duorme...siente a me
ca mo Rusina nun penza cchiù a te!
II
Nun mme penza? E comm''o ccredo?!
Mme vò' bene e tengo 'a prova...
Ca nun n'aggio cchiù na nova...
Sta malata?...Che sarrá?
Si sapesse chisti strazie
ca squartá mme fanno 'o core,
screvarría...cu tant'ammore
só' partuto...comme va?
Dice 'o signale:
.........................
III
Sti penziere só' turmiente:
accussí passo 'a nuttata...
Nun conchiudo...'int'a jurnata,
penzo justo a faticá!
Spisso dico: Turnarraggio...
Veco 'o sango 'mmiez'â via...
Ma po' penzo a mamma mia
e mm''a faccio a lacremá...
Dice 'o signale:
.........................
Scala - Capolongo