Bella,
zitta, tu nun ll'hê 'a dí
ch''ammore tujo sóngh'i'...
Sottavoce torna a giurá
ca nun mm'hê maje 'a lassá...
Nun fidarte, nun fá capí
ch''ammore tujo sóngh'i'...
Damme 'a vocca pe' te vasá...
Saccio 'e vase ca mme saje dá:
Vase cianciuse
ca 'e musse 'nfuse
ce fanno fá...
Troppo fucuse,
luonghe e azzeccuse
pe' c''e scurdá...
ah...ah...
Cu 'a stanza ô scuro,
chin''e paura,
senza sciatá...
Comme a chi arrobba,
tremmanno, c'îmm''a vasá...
II
Bella,
ll'ommo ca sta cu te,
è tanto amico a me...
Si lle faccio 'sta 'nfamitá,
è pecché saje vasá...
Stu segreto ha da rummané
tra tutt'e duje, Carmè'...
Damme 'a vocca pe' te vasá...
stammo sule...mo mm''e ppuó' dá:
Vase cianciuse
ca 'e musse 'nfuse
ce fanno fá...
Date annascuso,
cu 'e pporte 'nchiuse,
senza scuccá...
ah...ah...
Sti vase forte
ca sulo 'a morte
cancellarrá,
sóngo,'e st'ammore,
tutt''a felicitá!
Raffaele Viviani